Հեռահար ուսուցում
Այն նոր հնարավորություններ կբացի դպրոցների համար
18.03.2008թ., «Հայաստանի Հանրապետություն» օրաթերթ
Առեւտրի ու տնտեսական զարգացման եւ կրթության ու գիտության նախարարությունների, Սյունիքի մարզպետարանի, «Կրթական տեխնոլոգիաների ազգային կենտրոն» ՊՈԱԿ-ի համագործակցության արդյունքում ԵՊՀ-ին առընթեր Ա. Շահինյանի անվան ֆիզիկամաթեմատիկական հատուկ դպրոցի եւ Սյունիքի մարզի 5 դպրոցների մասնակցությամբ հեռահար ուսուցման պիլոտային ծրագիր է իրականացվում։ Մայրաքաղաքի դպրոցի տեխնիկապես զինված դասարանում անցկացվող պարապմունքներին համակարգիչների եւ համապատասխան սարքավորումների օգնությամբ ինտերնետ կապով կարող են միաժամանակ մասնակցել Սյունիքի մարզի 5 դպրոցների նույն դասարանի աշակերտները։ >>>

Նորարար ուսուցիչների եվրոպական համաժողով
07.03.2008թ.
«Մայքրոսոֆթ» ընկերությունը Կրթական տեխնոլոգիաների ազգային կենտրոնի (ԿՏԱԿ) տնօրեն Ա.Գրիգորյանին եւ Երեւանի պետական համալսարանին առընթեր Ա.Շահինյանի անվան ֆիզմաթ դպրոցի ուսուցիչներ Ա.Մամյանին ու Հ.Լալայանին հրավիրել է մասնակցելու Նորարար ուսուցիչների եվրոպական համաժողովին (European ITF 2008)։

European ITF 2008 համաժողովի աշխատանքներն ընթանում են մարտի 5-ից 10–ը՝ Խորվաթիայի Հանրապետության մայրաքաղաք Զագրեբում։

Սեփ. լր.
Լուսանկարները >>>

Էլեկտրոնային ձեռնարկներ ստացան Կոտայքի, Գեղարքունիքի և Տավուշի դպրոցները
06.03.2008թ.,
Կրթական տեխնոլոգիաների ազգային կենտրոնի (ԿՏԱԿ) աշխատակիցները Բաց հասարակության ինստիտուտի օժանդակության հիմնադրամի հայաստանյան մասնաճյուղի (ԲՀԻ ՕՀ ՀՄ) աջակցությամբ ստեղծված 14 էլեկտրոնային ուսումնական ձեռնարկների ծրագրային լրամշակման, բազմացման և տարածման աշխատանքներին նվիրված շնորհանդեսներ կազմակերպեցին և ձեռնարկների հավաքածուները հանձնեցին Կոտայքի, Գեղարքունիքի և Տավուշի մարզերի դպրոցներին։

Երևանի պետական համալսարանի ինֆորմատիկայի և կիրառական մաթեմատիկայի ֆակուլտետի ալգորիթմական լեզուների ամբիոնում ստեղծված էլեկտրոնային ձեռնարկների հավաքածուներն անվճար սկզբունքով, որպես նվիրատվություն ստացան Կոտայքի մարզի 36, Գեղարքունիքի մարզի 22 և Տավուշի մարզի 50 դպրոցներ։

Լուսանկարները >>>

Սիրելի՛ ուսուցչուհիներ, կրթության համակարգի աշխատակցուհիներ,
շնորհավորում եմ բոլորիդ Մարտի 8-ի՝ Կանանց տոնի առթիվ։ Առիթն օգտագործելով՝ ցանկանում եմ ընդգծել այն վաստակը, որ դուք ունեցել եք եւ ունեք մեր համակարգի կայացման գործում։
Հայ կինը բոլոր ժամանակներում եղել է ընտանեկան, ազգային լավագույն ավանդույթների կրողն ու փոխանցողը։ Նրա փխրուն ուսերին է եղել նոր սերնդի դաստիարակության եւ կրթության ծանր բեռը, որը նա պատվով է կրել։
Մեծ նվիրումով դուք Ձեր ակնածանքի արժանի առաքելությունն այսօր կատարում եք նաեւ մեր կրթօջախներում, ինչի համար ամենաանկեղծ խոնարհումի եւ գնահատանքի եք արժանի։
Ընդունեք ջերմ բարեմաղթանքներս, եւ կրկին անգամ շնորհավորում եմ Մարտի 8-ի գեղեցիկ տոնի առթիվ։

ՀՀ ԿԳ նախարար Լեւոն Մկրտչյան
«Կրթություն» շաբաթաթերթ
05.03.2008թ.